Godzijdank

T'is nog zo stille
T'is nog zo vroeg
Buutn ist nog donker
Binn ist echt koed
Neffest et bedde
Staat zinne wekker
Oe zot zoe zien
Dat die vo ne kji
Nie aflopt

Jet em nie nodig
Jist al gewend
Soms wilt je hoorn
Wuk daj eigenlijk al kent
Zie ligt te kiekn
Vlak neffest em
Ie zal subiet ipstoan
'T is verre et moment

Ze let op eur oasem
Ze oed em constant
Niks van beweginge
Ze is goed getraind
Z'eit in de hand
Ze weten vree goed
Dat nanderd wakker is
Ma ze zeggen gin woord
Want toen zegt je niks mis

En ineens
Ist de wekker die gaat
En tdeurt gin seconde
Voor dat ie ipstoat
En nu magt ie vertrekken naart werk
Godzijdank
Vertrekn naart werk

Jis uut de deure
Eindelijk rust
Em moe na brussel
Zie bluuft an de kust
Ze drinkt van eur drankske
Ze vul et nog bie
En derachter nog twee keer
Wacht pak ma drie
Vanwa nie

Waarom zoe ze stoppen
Ze doet eigenlijk nie slicht
En ze eit eigenlijk nog ma juuste
Hjil heringericht
En ineens ist er een stemme die zegt
'Ge gaat moetn weggoan tis u volle recht'
Moar ist ie nog efkes ipt werk
Godzijdank
Ke nog tid
Jis upt werk

Doet nie vo de kinders
Doet nie vo u oeders
Geloof mie ik weet oe dat goat
En kweetet verzekers
Tga nu echt nie betern
Ut de grond van men herte
Kverstoat
Minne moat

T'is nog zo stille
T'is nog zo vroeg
Nog altid te donker
Nog altid te koed