Will

Ey, hühr op! Mann loss die Stöhl doch unge stonn
Drieh die Hähn nit öm - wie? - wer löht sich he jonn?
Na un? Dei Schmier kann kumme, 'sch jevv ihr eine uss
E Kölsch un 'ne Korn noch - vürher jonn ich nit he russ

Nur noch eine - Will - un dann beeste mich loss
Ey, maach dat Glas he noch ens voll un wat et koss
Dat saach mer morje, maach 'ne Deckel, schriev et ahn
'Sch jonn morje fröh treck noh der Bank

Usserdämm - schött dir och ens eine enn
Drink wodrop de wills ich drink nit jähn allein
Op die Haie, op der Toni un wenn et sinn muss
Op uns're schöne Dom un op die Frittebuud vüür'm Puff

Wo wohr 'sch stonnjehblevve? - Midlife Crisis - stemp!
Schwachsinn - ich kenn keiner der 't met mir opnemp
Jeistig, körperlich un - Will - 'sch saach dir em Bett:
Fünfmohl locker! Jede Wett!

Spar dir ding Rootschlääch, ich kenn all Kalendersprüch
Ich bruch kein Tips vun dir, e Bier jenüsch
Ahm Eng en Mark noch, für jet Lalla uss der Box
'Sch drück uns jet vun fröher, jet wat noch richtich joht lossrotz

Mensch, do kenns ming Ahl doch, hätt's do je jedaach
Dat die fähig wöhr, janz einfach övver Naach
Mich opzejevve - mir nix - dir nix - Schluss?
Will - ich gläuv, die ess bestuss!

Die weed sich noch wundre, denn su ne Kääl wie mich
Kritt die en ihrem Alter - unn wie die ussüht - nit e zweitmohl erwisch
Kannste mir ens saare: Mann, wodrahn hätt et der jefählt?
Die hatt doch bei mir alles, vum Fiesta bess zom Täschejeld