Ya Zoplya Jagat
Dashrath Pujari, Ram More
या झोपल्या जगात नाही कुणीच जागे
बिलगूनिया धरेला आकाश गुज सांगे
आकाश गुज सांगे
माळून हार डोई रानातल्या फुलांचा
ल्याली वसुंधरा ही अभिसार चांदण्याचा
मधुवंतीचा सुवास वाऱ्यावरी तरंगे
बिलगूनिया धरेला आकाश गुज सांगे
आकाश गुज सांगे
स्वप्नील लोचनांत झुकता हळूच चांद
देहातुनी सुरेख घुमला मधूर नाद
निःशब्द रात्र जाई गुंफीत प्रीतिधागे
बिलगूनिया धरेला आकाश गुज सांगे
आकाश गुज सांगे
आली फुलून काया कंपीत गात्र झाले
बेबंद बरसणारे मन मेघ मेघ झाले
होती भल्या पहाटे ती एकरूप दोघे
बिलगूनिया धरेला आकाश गुज सांगे
आकाश गुज सांगे