Wie's Ek Met Niks

Ek staan voor die huis waar ons woon
En ek sien hoe die vuur dit verteer
Ek hoor hoe breek die vensters
Ek kan niks doen om die vlamme te keer

Ek staan met my vrou en my kinders
En die honde wat ons darm kon red
En ek kyk hoe ons lewe inmekaar stort
En die klere aan ons lyf is wat ons het

Ek staan voor die huis waar ons lewe
Ek sien die vlamme wat dit genadeloos steel
En waar daar nou net ‘n vuur op die aarde brand
Was dit gister nog alles mooi heel

Nou dat ek alles verloor het
Niks meer bewyse van ons lewe meer oor het
Geen muur wat nog staan
Geen horlosie om aan die tyd vas te klou

Nou dat ek alles verloor het
Niks meer bewyse van ons lewe meer oor het
Wie is ek nou, wie is ek nou
Wie's ek met niks?

Almal in die omgewing kom troos my
Mense bring kos en bring hoop
Ek leer weer die goedheid van mense
Wat ek vergete het in die wêreld bestaan

Hoe begin mens weer alles van voor af?
Hoe maak mens weer skatte bymekaar?
Maar my skatte is hier by my
My vrou en my kinders
Het die vuur my geleer in die nag

Nou dat ek alles verloor het
Niks meer bewyse van ons lewe meer oor het
Geen muur wat nog staan
Geen horlosie om aan die tyd vas te klou

Nou dat ek alles verloor het
Niks meer bewyse van ons lewe meer oor het
Wie is ek nou, wie is ek nou
Wie’s ek met niks?

So as ek net een iets kon red
As ek aan een ding net styf vas kon klou
Wat sou dit wees?
Ek weet nou die antwoord
Is my liefde vir jou