UN SERVU

Un servu tempu fa, di chista piazza
cussì priava a Cristu, e nci dicìa:
«Signuri, ’u me’ patruni mi strapazza,
mi tratta comu’n cani pi la via,
tutti mi pigghia cu’ la so’ manazza,
la vita dici chi mancu è la mia.
Si jeu mi lagnu chiu, peju amminazza,
ch’i ferri mi castija a prigiunia,
und’io mo’ ti pregu: chista malarazza
distruggimmila tu, Cristu, pi mia”.»
E Cristu nci rispusi da la cruci:
«E tu forsi chi hai ciunchi li vrazza?
Oppuru l’ha ’nchiuvati com’a mia?
Cu’ voli la giustizia si la fazza,
non speri c’atru la fazza pi tia.
Si tu sì omu e non sì testa pazza,
menti a profittu ’sta sintenzia mia:
jeu nun sarìa supr’a ’sta cruciazza,
s’avissi fattu quantu dicu a tia!»
Ma â Cresia ’sta risposta non nci piacìu,
e cusì la cangiàu:
«E tu chi ti scurdasti, o testa pazza,
chiddu ch’è scrittu nta la leggi mia?
Sempr’in guerra sarà l’umana razza
si cu’ l’offisi l’offisi castija.
A cu’ l’offendi lu vasa e l’abbrazza
e in Paradisu sidirai cu’ mia.
M’inchiovaru l’Ebrei nta ’sta cruciazza,
e cielu e terra disfari putìa!»
Ma a nui ndi piaci m’a cantamu cusì:
«E tu forsi chi hai ciunchi li vrazza?
Oppuru l’ha ’nchiuvati com’a mia?
Cu’ voli la giustizia si la fazza,
non speri c’atru la fazza pi tia.»